Gjykata e Lartë pritet të plotësohet me 3 anëtarë të cilët vijnë nga juristët jashtë sistemin gjyqësor. Këshilli i Lartë Gjyqësor ka njoftuar se tre kandidatët që plotësojnë kriteret dhe janë përzgjedhur nga një punë disamujore janë Sokol Sadushaj, Ilir Panda dhe Ervin Pupe.
KLGJ do të zhvillojë një mbledhje të enjten ku do të pikëzojë tre juristët dhe më pas emrat e tyre do t’i dërgohen për dekretim presidentit të republikës. Numri një i shtetit ka afat 30 ditë për t’i dekretuar. Nëse kjo nuk ndodh, sipas ligjit ata automatikisht marrin emërimin.
Ky zhvillim pritet të lehtësojë pak situatën ku ndodhet Gjykata e Lartë pasi stoku i dosjeve ka kaluar 35 mijë.
Me emërimin e tre juristëve gjykata do të ketë 4 anëtarë dhe mund të fillojë shqyrtimin e dosjeve që kërkojnë një trupë me tre gjyqtarë. Ndërsa KLGJ pritet të hapë garën edhe për 14 vende vakante në Gjykatën e Lartë, këta kandidatë sipas ligjit duhet të vijnë nga sistemi gjyqësor.
Po në këtë mbledhje, Këshilli i Lartë Gjyqësor vendosi të hape garën për 5 vende vakante në Gjykatën e posaçme të Apelit.
