Drejtori i Departamentit për Rendin dhe Sigurinë Publike Rebani Jaupi mbajti mëngjesin e së enjtes në një deklaratë për mediat lidhur me masat e ndërmarra nga Policia e Shtetit, për garantimin e rendit dhe sigurisë gjatë procesit zgjedhor.

Drejtuesi i policisë tha se 7530 policë do të jenë në terren gjatë zgjedhjeve të 14 majit.

5211 policë do të jenë të angazhuar në ruajtjen e objekteve zgjedhore, nënvijëzoi Jaupi ndërsa theksoi se e gjithë trupa policore do jetë në gatishmëri të plotë.

“Në këtë kuadër janë trajnuar 7530 punonjës policie, të cilët do të angazhohen me detyra gjatë procesit zgjedhor, sipas niveleve të menaxhimit policor, që nga niveli bazë i veprimit policor. Janë kryer përllogaritjet e numrit të punonjësve të Policisë dhe nevojave të tyre për pajisje, automjete dhe shërbime të tjera logjistike, që do të angazhohen për sigurimin e 5211 qendrave të votimit, 92 KZAZ-ve dhe 92 VNV-ve. Në zbatim të kërkesave të Kodit Zgjedhor, brenda afatit të përcaktuar, më datë 03.05.2023, Drejtoria e Përgjithshme e Policisë së Shtetit dërgoi në KQZ:  Listën me 5511 punonjës policie që do të angazhohen për ruajtjen e objekteve zgjedhore në të gjithë Shqipërinë, të cilët do të ndërhyjnë në rast se kërkohet nga komisionet zgjedhore apo nga KQZ-ja;  Listën me 305 automjete civile, që do të përdoren në funksion të përmbushjes së detyrimeve të Policisë së Shtetit, për garantimin e rendit dhe sigurisë publike gjatë procesit zgjedhor”, tha mes të tjerash Jaupi.

LEXONI GJITHASHTU:

• Ambasadori i SHBA-ve në OSBE: Do t’i ndjekim me kujdes zgjedhjet në Mal të Zi
• “Zgjedhjet të jenë të lira’, Begaj: Administrata zgjedhore rëndësi në këtë proces