Ky është vetëm takimi i parë zyrtar, dhe me sa duket kryeministri shqiptar, Edi Rama nuk pati një përgjigje për bagazhet e vjetra ku mbarten marrëdhëniet Shqipëri-Kosovë pas 77 marrëveshjeve të firmosura në letër, siç numëroi jo pa bezdi Kurti.
“Do të formojmë një komision ndërshtetëror që ato 77 marrëveshje që janë nënshkruar deri më tani të zbatohen, por edhe të shtohen me marrëveshje të reja”, – tha kreu i ri i qeverisë së Kosovës.
Mikpritësi i Tiranës nuk ja kurseu përmendjen si kryeministër i ri në detyrë Albin Kurtit, kur kërkoi shpejtësi të re, jo vetëm marrëveshje të reja.
“Albini e quan fillim i ri, është i ri në detyrë, por një shpejtësi e re është e domosdoshme, sepse faktikisht kemi shumë marrëveshje. Një pjesë e tyre kanë ecur mirë, një pjesë e tyre nuk kanë ecur mirë”, – tha kryeministri shqiptar.
Pas Pejës, Shkodra do të jetë qyteti ku do të mblidhen dy qeveritë në muajin mars.
Menjëherë pas takimit me Kryeministrin, Albin Kurti shkoi në selinë e Partisë Demokratike për një takim të shkurtër me kreun e opozitës, Lulzim Basha në të cilin të dy nënvizuan nevojën për bashkëpunim pozitë-opozitë në të dyja anët e kufirit në të mirë të qytetarëve.
“Pozitë-opozitë në të dy anët e kufirit, Kuvend dhe qeveri do të bashkëpunojmë në mënyrë që Kosova dhe Shqipëria të jenë në nivel të detyrës, jo vetëm zyrtare, por edhe historike për qytetarët tanë, të cilët siç e dinë janë edhe me varfërinë më të madhe, edhe me papunësinë më të madhe jo vetëm në rajonin tonë”, tha z. Kurti.
Nga ana e tij, kryedemokrati shprehu gjithë gatishmërinë për të ndihmuar në integrimin ekonomik të dy vendeve dhe punësimin e të rinjve.
“Dhe ne do të bëjmë gjithçka për të ndihmuar në tregtinë e lirë, në integrimin ekonomik të Shqipërisë dhe Kosovës, për t’i dhënë shanse për punësim qytetarëve tanë e, në veçanti rinisë, për të ndalur shpopullimin që është produkt i drejtpërdrejtë i korrupsionit dhe kapjes së shtetit nga krimi i organizua”, – tha z. Basha.
Në mbyllje të vizitës së tij, z. Kurti takoi presidentin Ilir Meta i cili në një reagim në Facebook u shpreh se qeveria e kryeministrit të Kosovës i ka të gjitha mundësitë të jetë një shembull pozitiv i mirëqeverisjes në rajonin tonë.
Ajo që duhet, sipas kreut të shtetit, është të konkretizohet partneriteti strategjik me Kosovën, duke e bërë atë një model dhe inkurajim për bashkëpunimin rajonal.
