13 mijë familje vazhdojnë të jenë të pastreha pas dëmeve që shkaktoi tërmeti i 3 viteve më parë në nëntor të 2019-s.
Sipas të dhënave të audituara nga Ministria e Financave në buxhetin faktik 2021, rezulton se 12.994 familje janë trajtuar me bonus qiraje dhe vetëm 3.243 kanë arritur të akomodohen në shtëpitë e reja.
Raporti i financave nënvizon se si pasojë e zvarritjes së projekteve për rindërtimin, buxheti i shtetit ka paguar 12.3 milion euro më shumë për bonusin e qirasë për të pastrehet e tërmetit.
Në planin fillestar të vitit të shkuar qeveria kishte programuar 12.5 milion euro për trajtimin me bonus qiraje, por në fund taksapaguesit kanë paguar 24.8 milion euro.
Shkaku kryesor i vonesës ka qënë ngadalësia në vlerësimin e dëmeve, punë që udhëhiqej nga ekipet e kordinuara nga Minsitria e Rindërtimit dhe Instituti i Ndërtimit dhe hartimi i projekteve nga agjencitë zbatuese, ku peshën kryesore e zë Fondi Shqiptar i Zhvillimit.
Taksapaguesit kanë dhënë në dy vjet 395 milion euro për rindërtimin, por vetëm 20% e familjeve që kanë mbetur pa shtëpi kanë arritur të akomodohen.
Në dy vitet e fundit Fondi Shqiptar i Zhvillimit ka marrë 148 milion euro për rindërtimin e mbi 7 mijë objekteve, ndërsa në fund të vitit të shkuar rezultonin të dorëzuara vetëm 775 prej tyre.
Procesi i rindërtimit është një nga më të ngadaltët në historinë e projekteve në infrastrukturë, ku fondet nga buxheti nuk kanë munguar, emergjenca u lejoi autoriteteve zhvillimin e tenderave sekretë, por punimet nuk përfundojnë duke detyruar që çdo muaj buxheti të paguajë miliona euro për qiranë e familjeve të pastreha.
LEXONI GJITHASHTU: