“Do hakmerremi”- Kandidati kanadez për kryeministër i përgjigjet Trump për tarifat

Kandidati kryesor për postin e kryeministrit të ardhshëm të Kanadasë, Mark Carney, ka deklaruar se vendi i tij do të përballet me një “bullizues” si Trump, pas vendosjes së tarifave të reja nga administrata e Presidentit amerikan për Kandanë.

Në një intervistë ekskluzive për BBC Neësnight, Carney tha se Kanadaja do të “përputhë dollar për dollar” tarifat amerikane, duke paralajmëruar një kundërpërgjigje të fortë ndaj vendimit të Shtëpisë së Bardhë për të vendosur tarifa 25% ndaj Kanadasë.

“Presidenti Trump ndoshta mendon se Kanadaja do të dorëzohet. Por ne do t’i rezistojmë një dhunuesi dhe nuk do të tërhiqemi. Ne jemi të bashkuar dhe do të hakmerremi,” tha ai.

Carney, ish-guvernatori i Bankës së Kanadasë dhe Bankës së Anglisë, shpalli kandidaturën e tij për lider të Partisë Liberale në janar dhe aktualisht është favorit për të pasuar kryeministrin Justin Trudeau. Gara për lidershipin do të përfundojë më 9 mars, dhe fituesi do të zëvendësojë Trudeau si kryeministër, duke udhëhequr partinë në zgjedhjet federale të planifikuara për 20 tetor.

Partia Liberale përballet me një sfidë të vështirë përballë Konservatorëve, të cilët aktualisht udhëheqin në sondazhe.

Carney paralajmëroi se tarifat e reja “do të dëmtojnë reputacionin e SHBA-së në mbarë botën, do të godasin rritjen ekonomike, do të rrisin inflacionin dhe normat e interesit”. Ai e quajti këtë vendim si një tjetër rast ku SHBA “prish një marrëveshje tregtare me partnerin e saj më të afërt”, duke iu referuar ndryshimeve në marrëveshjen NAFTA në vitin 2020.

Ekonomistët kanë paralajmëruar se tarifat mund të kenë një ndikim negativ për ekonominë kanadeze dhe të çojnë në rritje çmimesh për konsumatorët amerikanë.

Në përgjigje të vendimit të Trump, Trudeau deklaroi se Kanadaja do të marrë masa të menjëhershme dhe të fuqishme për të mbrojtur interesat e saj ekonomike.

“Ky është një moment i rëndësishëm për marrëdhëniet tona tregtare. Ne nuk do të pranojmë masa të padrejta që dëmtojnë ekonominë dhe qytetarët tanë,” tha Trudeau.

Ndërsa administrata e Trump synon të vendosë tarifa shtesë ndaj Bashkimit Evropian, Kanadaja po shqyrton mundësitë për kundërpërgjigje dhe negociata të mundshme me Uashingtonin. Bordi i Tregtisë dhe Ministria e Financave pritet të publikojnë detaje mbi masat e ardhshme në ditët në vijim.

LEXONI GJITHASHTU:

• Trump vendos tarifa të reja për importet nga Kanadaja, Meksika dhe Kina
• BE vendos tarifa të reja për importet e grurit nga Rusia dhe Bjellorusia