Policia Rrugore e ka nisur vitin 2020 me masa të rrepta ndaj drejtuesve të automjeteve që shkelin rregullat e qarkullimit rrugor, pasi gjatë 24 ditëve të para janë pezulluar mbi 900 leje drejtimi.

Ministri i Brendshëm, Sandër Lleshaj gjatë inspektimi të një patrulle policie në terren, u shpreh se ky vit do të shoqërohet me një fushatë të madhe për forcimin e parametrave të sigurisë rrugore.

Humbja e jetëve në aksidentet rrugore vijon të mbetet një prej problemeve të madha në vend dhe pavarësisht forcimit të ndëshkimeve në Kodin Rrugor, duket se kjo nuk ka sjellë rezultatin e pritshëm.

Lleshaj pranoi gjatë inspektimit se, “niveli i papërgjegjshmërisë në rrugët e vendit mbetet i madh”.

Policia e Shtetit e ka quajtur planin e masave “Tispol 2020” dhe ka si synim shtimin e masave për parandalimin e aksidenteve rrugore.

Në këtë kuadër, në të gjitha rrugët nacionale dhe në qytetin e Tiranës, qarkullimi i automjeteve monitorohet nga radarë “Trucam” dhe “Petrol”, të kolauduar sipas normave dhe rregullave të vendeve të BE-së.

Edhe në qarqet ku nuk ka radarë, qarkullimi monitorohet nga Njësia Operacionale e Policisë Rrugore, e cila ushtron kontrolle të befasishme

Në 24 ditët e para të janarit bëhet e ditur se, janë pezulluar 905 leje drejtimi si dhe janë vendosur 1845 masa administrative për tejkalim të shpejtësisë. Shkelësit më të mëdhenj janë vërejtur në Tiranë dhe Durrës.