Evropa

200 mijë të infektuar në të gjithë botën, kreu i ekipit kinez këshillon Europën

Përditësimi i fundit: 18/03/2020 - 15:39
Text size Aa Aa

Tani janë më shumë se 200 mijë raste personash të infektuar me coronavirus në të gjithë botën, dhe më shumë se 8000 kanë humbur jetën.

Kina, ku coronavirusi COVID-19 u shfaq për herë të parë, para disa muajsh, vazhdon të ketë numrin më të lartë të të prekurve.

Por prej pak ditësh, numri i të prekurve jashtë Kinës është më i madh.

 Zhong Nanshan, kreu i ekipit mjekësor kinez që u mor me përgjigjen ndaj coronavirusit, i bëri thirrje Europës që të marrë masa më të ashpra kundër përhapjes.

“Mos prisni sa të jetë shumë vonë”, tha ai.

Udhëheqësit e BE-së kanë rënë dakord që të mos lejojnë hyrjen e personave të huaj në BE për 30 ditë, ndërkohë që disa nga vendet kanë mbyllur çdo veprimtari në publik për të mos lejuar përhapjen e virusit.

Por Zhong Nanshan tha se ndonëse disa vende janë duke i zbatuar masat, në vendet e tjera njerëzit dalin për kafe e vazhdojnë të takohen me miqtë.

“Kjo lloj karantine nuk funksionon ashtu”, tha ai, teksa këshillon të ashpërsohet reagimi.

Në SHBA, Presidenti amerikan njoftoi mbylljen e kufirit me Kanadanë, si rrjedhojë e një vendimi të përbashkët midis dy vendeve.

Presidentja e Komisionit Europian, Ursula von der Leyen, tha se kanë pasur mbështetje për masat e marra, ndërkohë që Europa është kthyer tani në qendrën botërore të virusit.

Italia është vendi i dytë pas Kinës për numrin më të madh të vdekjeve, gati një të tretën e gjithë vdekjeve në botë që janë shkaktuar nga COVID-19.

Një nga arsyet që ka ndihmuar për situatën është se Italia renditet e dyta në botë për popullsinë e plakur, menjëherë pas Japonisë.

Franca dhe Spanja po ashtu kanë pasur një numër të madh infektimesh dhe vdekjesh, dhe të dyja kanë nisur të marrin masa duke bllokuar qarkullimin e njerëzve dhe të makinave.

Mbretëria e Bashkuar, e cila pa 400 të infektuar brenda 24 orësh, u bëri thirrje britanikëve të largohen nga lokalet, klubet e restorantet, por gjithsesi, nuk i kanë mbyllur. Madje, as shkollat dhe veprimtari të tjera.

Qeveria britanike, ndërkohë, ka caktuar 360 miliardë euro në kredi për bizneset vendase, për t’i mbrojtur nga pandemia.  

Tregime të lidhura