Kastriot Sulka, ish-zv.ministër i Punës dhe Çështjeve Sociale thotë se reforma e shërbimeve sociale qëndron pezull prej 4 vjetësh.
Hartues i Partisë Demokratike për çështjet sociale duke iu referuar protestës së fundit të paraplegjikëve dhe tetraplegjikëve, tha se politika kohët e fundit po tregon se u përgjigjet vetëm kërkesave të atyre që dalin në rrugë.
Ndaj ai bëri thirrje që “paketat që përgatiten s’duhen bërë për përfitime politike por të konsultuara nga ekspertë të mirëfilltë”.
“Në politikë po përcaktohet gjithnjë e më shumë kush del në rrugë. Kjo nuk do të thotë se kush nuk del në rrugë të protestojë, nuk ka të drejtë. Reforma e shërbimeve sociale ka 4 vjet që vjen në për duart e njerëzve ku diskutohet që do të bëhet e decantralizuar apo do t’i kalojë pushtetit vendor”, tha ai.
Astrit Hado, drejtori i Institutit të Sigurimeve Shoqërore gjatë emisionit “RinOn” u shpreh se ISSH merret me trajtimin e “invalidëve të punës” ndërsa me trajtimin e personave me aftësi të kufizuara merret Shërbimi Social Shtetëror.
Hado tha se trajtimi i personave me aftësi të kufizuara bëhet në mënyrë të barabartë kurse trajtimi i invalidëve të punës përmes skemës së kontributeve dhe moshës.
