Shock

Opozita në zgjedhje l Bushati: Me një listë. Haxhiu: Humbin 3-4 deputetë

Përditësimi i fundit: 12/01/2021 - 20:40
Text size Aa Aa

Partitë e koalicionit opozitar ende nuk kanë vendosur nëse në zgjedhjet e 25 prillit do të paraqiten me dy lista apo një listë kandidatësh.

Për Andi Bushatin opozita duhet të shkojë në zgjedhje me koalicion të përbashkët duke ruajtur identitetin.

“E para se është një opozitë që ka djegur mandatet, nuk ka marrë pjesë në zgjedhjet lokale dhe ka marrë dy vendime radikalisht të forta duke u rrekur të na mbushë mendjen se jemi përballë një regjimi, regjimi luftohet me front”, tha ai.

Kurse Baton Haxhiu mendon se PD dhe LSI e kanë të pamundur të bashkohen pasi kanë diferenca jo vetëm në aspektin drejtues por edhe elektorati ka diferenca.

“Opozita po kërkon që të dalë në një listë kur janë të papajtueshëm që në një themel. Edhe elektorati është në kundërshtim me njëri-tjetrin. Matematikisht një listë është më e mirë për opozitën por nuk e arrin dot këtë”, tha z. Haxhiu.

Andi Bushati kundërshtoi duke thënë se ndarja ka qenë qëllimi kryesor i kryeministrit Edi Rama dhe për këtë arsye bëri ndryshimet në Kodin Zgjedhor dhe Kushtetutë ndaj theksoi se opozita nuk e ka luksin që të hyjë e ndarë.

“Nëse nuk bashkohet do t’i lehtësojnë vjedhjen e zgjedhjeve Ramës. Nuk e ka luksin të dalë e përçarë ” tha ai.

Sipas Baton Haxhiut një bashkimi artificial do të sjellë humbje të të paktën 3-4 deputetë për partitë opozitare pasi nuk do të arrijnë dot të grumbullojnë elektoratin.

 

Lexoni gjithashtu:

Rama kundër Trump në 2016, Haxhiu: I jap të drejtë intelektualit Rama, por jo kryeministrit. Bushati: Hipokrizi!