Kryeministri i Kosovës Albin Kurti, dëshmoi edhe një herë se mbetet politikani “rebel”. Kësaj here e tregoi në takimin për Ballkanin Perëndimor organizuar në kuadër të Konferencës së Mynihut. Edhe pse diskutimet u zhvilluan me dyer të mbyllura, në media qarkulloi video e fjalimit të tij që u shoqërua edhe me reagimin e Presidentit serb Aleksandër Vuçiç.
Kreu i ekzekutivit të Kosovës ka kundërshtuar idenë e Minishengenit Ballkanik, duke kërkuar një ‘Mini–marshall Plan’ për Ballkanin Perëndimor, ndërsa ka kritikuar direkt Thaçin, Vuçiçin, por edhe Ramën për çështjen e kufijve.
“Duhet të kemi parasysh tre parime për t’i shëruar plagët. Duhet ta përgatisim mirë, me parime të mira dialogun e ardhshëm në rajonin tonë, në veçanti atë ndërmjet Kosovës dhe Serbisë. E para s’ka marrëveshje pa dialog, e dyta s’ka dialog me harta, dhe së treti pa presidentë rreth hartave”-tha kryeministri i Kosovës, Albin Kurti.
Një tjetër deklaratë e fortë e tij në këtë takim nxiti reagimin e Presidentit Vuçiç.
“Pothuajse të gjithë prej jush na ndihmuat që 20 vjet më parë Kosova të çlirohet nga Serbia. Tani mendoj e ka ardhur koha që të ndihmohet Serbia për t’u çliruar nga Kosova”, shtoi z. Kurti.
Kurti ka kërkuar që gjashtë shtetet e Ballkanit Perëndimor të bashkohen njëherësh me Unionin. Me herët ai u shfaq kritik edhe për marrëveshjet që u firmosën në Mynih mes Kosovës dhe Serbisë, për të cilat tha se nuk është marrë asnjë autorizim nga qeveria e re.
Kryeministri i Kosovës përmes një reagimi në rrjetet sociale tha se qeveria e tij do të analizojë të gjithë hapat që janë marrë në të kaluarën dhe ministritë përkatëse janë të angazhuara ta trajtojnë me prioritet këtë çështje.
