Aleatët braktisin Macron, SHBA-Britani-BE: Jo trupa të NATO në Ukrainë

Edhe Uashingtoni ka dalë kundër idesë së presidentit Emmanuel Macron, për dërgimin e mundshëm të trupave tokësore në Ukrainë. Një funksionar i Shtëpisë së Bardhë ka deklaruar për agjencinë e lajmeve “Reuters” se Shtetet e Bashkuara nuk kanë në plan të dërgojnë trupa për të luftuar kundër rusëve.

Megjithatë, presidenti Joe Biden ka përsëritur apelin drejtuar Kongresit që të miratojë ndihmën e radhës për Ukrainën, “e cila ka nevojë më shumë se kurrë për mbështetje”, tha Biden.

Edhe Mbretëria e Bashkuar nuk ka ndërmend të dërgojë ushtarë në Ukrainë, aq më tepër në “shkallë të gjerë”.

Deklarata është bërë nga qeveria e Rishi Sunak, duke iu përgjigjur në mënyrë indirekte hipotezës së bërë nga shefi i Elizeut, për një prani ushtarake evropiane në terren.

Deri më sot, Londra zyrtare ka ofruar mbështetje duke dërguar në Ukrainë instruktorë ose këshilltarë ushtarakë, krahas sinjalizimeve për vullnetarë.

“Jemi në dijeni të deklaratave publike të disa shteteve anëtare, sipas të cilave mund të konsiderohet dërgimi i trupave tokësore në Ukrainë. Por kjo nuk është diskutuar në nivel evropian”.

Deklarata është bërë nga zëdhënësi i BE-së për politikën e jashtme Peter Stano, gjatë një konference për shtyp.

Por të mërkurën, Parisi zyrtar ka insistuar sërish mbi këtë ide. Ministri i Jashtëm Stéphane Séjourné ka deklaruar se për Ukrainën duhet të mendohen ide të reja, që t’i përgjigjen nevojave të saj. Ai i është referuar fushatës së çminimit të territoreve, luftës kibernetike dhe prodhimit të armëve në territorin ukrainas.

Më herët, ideja e presidentit Macron u refuzua edhe nga sekretari i përgjithshëm i NATO-s, Jens Stoltenberg dhe kancelari gjerman Olaf Scholz, ndërsa Moska deklaroi se një lëvizje e tillë do të çonte në luftë të hapur mes Rusisë dhe Perëndimit.

LEXONI GJITHASHTU: 

• Macron: Aleatët janë pajtuar për të furnizuar Ukrainën me raketa
• Macron bën deklaratën e fortë: Nuk përjashtohet dërgimi i trupave të NATO në Ukrainë