Algjeria ka kërkuar që 12 zyrtarë francezë të largohen brenda 48 orëve, një veprim që lidhet me arrestimin e tre shtetasve algjerianë në Francë, sipas një deklarate të ministrit të Jashtëm francez Jean-Noël Barrot, këtë të hënë.
Ministri francez kërkoi nga autoritetet algjeriane të tërheqin masën e dëbimit, duke paralajmëruar se nëse vendimi për të larguar zyrtarët francezë qëndron, Franca do të përgjigjet menjëherë.
Të 12 zyrtarët, disa prej të cilëve janë anëtarë të Ministrisë së Brendshme franceze, janë përfshirë në një aktakuzë që ka ngritur tensione në marrëdhëniet mes Algjerisë dhe Francës. Kjo masë e ndërmarrë nga Algjeria ka pasur një ndikim të ndjeshëm në përpjekjet për të riparuar lidhjet mes dy vendeve, të cilat janë ndikuar nga periudha koloniale.
Veprimi i Algjerisë ka ardhur pas padisë së ngritur nga prokurorët francezë ndaj tre shtetasve algjerianë, përfshirë një zyrtar konsullor, të cilët dyshohet se kanë qenë të përfshirë në rrëmbimin e influencuesit algjerian, Amir Boukhors, në periferi të Parisit në prill të vitit 2024. Boukhors, i njohur si “Amir DZ” dhe një kundërshtar i qeverisë algjeriane, është një figurë e njohur me më shumë se një milion ndjekës në TikTok.
Boukhors, i cili ka jetuar në Francë që nga viti 2016 dhe iu dha azil politik në vitin 2023, u rrëmbye dhe më pas u lirua një ditë pas ngjarjes, sipas avokatit të tij. Algjeria kërkon kthimin e tij për t’u përballur me akuzat për mashtrim dhe veprat terroriste, për të cilat ka lëshuar nëntë urdhër-arreste ndërkombëtare.
LEXONI GJITHASHTU:
- BE vendos sanksione ndaj Aleksandër Vulin: “Për veprime destabilizuese ruse”
- “Kemi një kalendar që do e realizojmë”, Costa: Në maj vizitoj Ballkanin Perëndimor
