Shqipëria dhe Maqedonia e Veriut vijojnë të jenë në pritje të çeljes së dritës jeshile për anëtarësim në familjen e madhe të Bashkimi Europian. Teksa muajt kalojnë, duket që shanset për të dyja vendet në përafrimin me Bashkimin Europian sa vijnë dhe rriten.
Mediat në Gjermani thanë se mundësitë që Shqipëria të marrë dritën jeshile për hapjen e negociatave me Bashkimin Europian janë rritur.
Sinjale pozitive për rrugën e anëtarësimin në unionin europian po vijnë këtë fillim viti nga Franca, por edhe Komisioni i ri Europian.
Vendimi ka të ngjarë të merret gjatë Samitit të Zagrebit, i cili do të mbahet me 6-7 maj, i konsideruar si ngjarja më e rëndësishme e Presidencës kroate, që ka nisur punën me moton, “Një Europë e fortë, në një botë sfidash”.
Franca po rishikon qëndrimin e saj për hapjen e negociatave, gjë që e bëri publike edhe Presidenti Macron, në takimin e tij në Paris me kryeministrin kroat Andrej Plenkoviç, ku deklaroi se “Franca uron që Samiti i Zagrebit të jetë një moment uniteti dhe një sukses për Europën”.
Refuzimi i negociatave në muajin tetor të 2019 shkaktoi pakënaqësi në Shqipëri dhe në Maqedoninë e Veriut, ndërsa partitë opozitare vërshuan me kritika ndaj qeverive respektive.
Partia Demokratike dhe opozita e bashkuar për këtë dështim kritikuan drejtpërdrejt kryeministrin e vendit Edi Ramën, duke thënë se mohimi i negociatave nuk lidhet me reformimin brenda vetë BE, por se Shqipëria nuk ka plotësuar kushtet kryesore për anëtarësim.
