Ndërsa kanë mbetur rreth 10 ditë nga afati për mbylljen e aplikimit online për rindërtimin, ka nga ata qytetarë që ende nuk e dinë se çfarë është ky proces. Zyra Kaziu, banore e Prezës na thotë se, ësthë e paqartë se çfarë duhet të bëjë për të përfituar nga rindërtimi.

“Na tha një gocë një ditë shkoni aplikoni. Asgjë nuk kemi bërë, as bonus qiraje”, shprehet Zyra Kaziu, banore në Prezë.

Një tjetër banore e Prezës, Dije Koxheri nuk ka pranuar ta bëjë aplikimin online pasi pretendon se demi nuk është vlerësuar në masën e duhur

“Kam bërë një kërkesë të dytë se nuk isha e kënaqur, ma kishin shkruar Ds2, dëmtim i lehtë. Aty thotë i pabanueshëm, kur pyes në komunë e kishin shkruar dëmtim i lehtë. Ata thonë se do të japin 1 milion, 3 milionë lekë. A rregullohet shtëpie me aq? Të jetë për 1 milion, i marr borxh e rregulloj. Prandaj e kam lënë se nuk kam mundësi se me qenë e rregulloj vetë”, tregon Dije Kozheri, banore e Prezës. Që prej 26 nëntorit, 5 anëtarë të familjes Koxheri jetojnë në çadër në oborrin e shtëpisë.