Presidenti i ri i SHBA-ve, Donald Trump reagoi të dielën për situatën në Siri duke shkruar se Rusia nuk ishte e interesuar të mbronte presidentin Bashar al-Assad, duke e detyruar atë të largohej nga vendi.
Assad ka humbur çdo gjurmë pasi grupet anti-regjim morën kontrollin e kryeqytetit Damaskun herët të dielën. Kjo erdhi pothuajse një javë pasi grupet anti-regjim morën kontrollin e Aleppos, një qytet i madh në Sirinë veriore.
“Assad është zhdukur. Ai ka ikur nga vendi i tij. Mbrojtësi i tij, Rusia, e udhëhequr nga Vladimir Putin, nuk ishte e interesuar ta mbronte më atë”, shkroi Trump në një postim në rrjetin “Truth Social”.
“Nuk kishte asnjë arsye që Rusia të ishte atje në radhë të parë. Ata humbën çdo interes për Sirinë për shkak të Ukrainës, ku rreth 600,000 ushtarë rusë janë të plagosur ose të vdekur, në një luftë që nuk duhej të kishte filluar kurrë dhe që mund të vazhdonte përgjithmonë”, shtoi ai.
Trump ka thënë po ashtu se lufta në Ukrainë e ka dobësuar Rusinë dhe Iranin.
“Rusia dhe Irani janë në një gjendje të dobësuar tani, njëra për shkak të Ukrainës dhe ekonomisë së keqe, tjetra për shkak të Izraelit dhe suksesit të tij luftarak”, është shprehur presidenti i ardhshëm i SHBA-së.
LEXONI GJITHASHTU:
- Rebelët sirianë pushtojnë Damaskun dhe fillojnë festimet: Assad ka ikur
- “E kemi rrëzuar presidentin Assad”, rebelët sirianë deklaratë në “TV Shtetëror”
