Kryetari i Partisë Demokratike, Lulzim Basha deri tani nuk kishte shprehur qëndrimin lidhur me thirrjen e Presidentit, Ilir Meta për tubim në bulevardin “Dëshmorët e Kombit” më 2 mars, për të parandaluar atë që ai e cilëson “grusht shteti”.
Në një reagim të bërë të dielën në rrjetet sociale, z. Basha shprehet se, “duhet t’i përgjigjemi çdo thirrje në mbrojtje Kushtetutës dhe funksionimin demokratik të institucioneve të pavarura. Prandaj unë e mbështes tubimin e thirrur nga Presidenti për Kushtetutën!”
“Kapja e Gjykatës Kushtetuese do të thotë asgjësim i të drejtave dhe lirive të çdo qytetari. Ne nuk mund të pranojmë që Shqipëria të kthehet 30 vite prapa. Thirrja e Presidentit nuk është për partitë politike, apo për të djathtët apo të majtët, por për qytetarët shqiptarë që të mbrojnë themelin e demokracisë që është Kushtetuta”, deklaron kreu i PD.
Më pas, z. Basha bën thirrje për zgjedhje të parakohshme si mënyrë e vetme për të dalë nga kriza politike dhe Kushtetuese ku gjendet Shqipërisë.
“Kudo ku shkoj dhe këdo që takoj, kërkesa kryesore e qytetarëve është të kenë një Qeveri të zgjedhur prej tyre dhe që kujdeset për ta, që i dëgjon dhe që është e ndershme me ta. Unë dhe opozita kemi qenë dhe jemi fare të qartë: Kushtetuta ka rënë, asaj i ka mbetur vetëm kapaku! Prandaj na duhet një zgjidhje politike për ta futur Shqipërinë në rrugën e duhur”, përfundoi lideri i opozitës.
Prej disa javësh, Presidenti i Republikës ka denoncuar se mazhoranca po tenton të kapë Gjykatën Kushtetuese duke i marrë kompetencat kreut të Shtetit. Për përplasjet mes Parlamentit dhe Presidentit, për emërimet në këtë gjykatë, pritet që Komisioni i Venecias të shprehet me opinion më 20 mars.
Ndërkohë për datën 2 mars, Ilir Meta ka paralajmëruar se do të firmosë “dekretin e parë për parandalimin e grushtit të shteti” ndaj reformës në drejtësi. Ende nuk dihet nëse ky paralajmërim bën fjalë për firmosjen e dekretit për shpërndarjen e Parlamentit.
