Bashkitë po bëhen me eficente në mbledhjen e taksave dhe të ardhurave nga burimet vendore. Në 9-mujorin e kaluar ato mblodhën 73 mld lekë, faturë kjo që rezulton të jetë më e lartë se vitet paraardhëse.
Nga muaji janar deri në shtator 2022, të gjitha bashkitë e vendit kishin në dispozicion, 73 miliardë lekë, ndërkohë që shpenzuan 64 miliardë.
Këtë periudhë ato siguruan nga burimet e veta, 24 mld lekë, nga taksat 15 mld, nga tarifat 10 mld lekë. Pjesa tjetër janë nga transferta e pakushtëzuar dhe burimet e disponueshme.
Në raport me 9-mujorin e vitit 2021, të ardhurat janë rritur me 2%, ndërkohë që shpenzimet e përgjithshme janë ulur me 1%.
Taksat e pasurive të paluajtshme, të cilat janë burimi kryesor i të ardhurave regjistruan së bashku një nivel arkëtimi në masën 13 mld. Në vitin 2021, bashkitë kishin vjelë nga taksa e ndikimit në infrastrukturë dhe e pronave 11.9 mld lekë. Kjo rritje i atribuohet ndërtimeve të reja dhe eficencës së faturimeve.
Ndërkohë, raporti i Financave vendore nxjerr edhe detyrimet e prapambetura që bashkitë i kanë bizneseve, të cilat në muajin shtator u ulën në 6.6 mld lekë. 23% të këtij borxhi e ka Tirana, ndjekur nga Kavaja me 11% dhe Vora me 6%.
LEXONI GJITHASHTU: