Vetëm disa orë pas vrasjes së dyfishtë në Rrëshen, ku Esmeralda Filopati u ekzekutua së bashku me të vëllain nga ish-bashkëshorti, një tjetër krim në familje i mori jetën një gruaje, kësaj radhe në Durrës. Hajdie Tosuni, 59 vjeçe u godit për vdekje me levë hekuri nga bashkëshorti i saj.

Ngjarja e rëndë ndodhi në dyqanin e metrazheve në pronësi të familjes, në lagjen nr. 7 të qytetit bregdetar, ndërsa autori Rruzhdi Tosuni, 63 vjeç u arrestua në flagrancë nga policia. Dyshimet e para janë për një mosmarrëveshje mes çiftit në lidhje me shitjen e dyqanit, ndërsa ata që i njohin shprehen të habitur për ngjarjen.

Ndërkohë, në Rrëshen forcat speciale vijojnë aksionin për kapjen e autorit të vrasjes së dyfishtë, Fatmir Kolecaj. Pasi qëlloi me breshëri për vdekje në pritë mbi ish-bashkëshorten Esmeralda dhe kunatin Vledison Filopati, 47-vjeçari u largua me shpejtësi në një zonë të pyllëzuar.

Për informacione të vlefshme që do të çojnë në kapjen e tij policia ka vënë në dispozicion edhe një shpërblim prej 5 milionë lekësh.

Por ngjarja e së martës mbrëma mesa duket ka qenë një vrasje e paralajmëruar. Sipas një vendimi të Gjykatës në Lezhë, në janar të 2018-s autori është dënuar me vetëm 10 muaj burg për dhunë në familje dhe armëmbajtje pa leje duke përfituar edhe uljen e 13 së dënimit për shkak të gjykimit të shkurtuar.

Sipas prokurorisë, në atë kohë Kolecaj kishte dhunuar bashkëshorten me sende të forta dhe e kishte kërcënuar edhe me vrasje. Më pas çifti u divorcua dhe dyshohet se konfliktet vijuan për kujdestarinë e 3 fëmijëve që kishin nga martesa disavjeçare.

Lexoni gjithashtu: Sociologu Zyhdi Dervishi: Largimi i grave të dhunuara nga bashkëshorti, e vetmja zgjidhje kundër krimit në familje