Në kuadër të vizitës së tij zyrtare në Tiranë, Kryeministri i Kosovës, Albin Kurti zhvilloi disa takime me krerët e institucioneve në vend. Fillimisht ai u takua me Presidentin Ilir Meta. Zyra e shtypit e Presidencës bëri me dije se gjatë takimit Meta dhe Kurti kanë biseduar për intensifikimin e marrëdhënieve dhe domosdoshmërinë e rifillimit të dialogut ndërmjet Prishtinës dhe Beogradit.
Kryeministri i Kosovës u prit në takim edhe nga Kryeparlamentari Gramz Ruçi dhe Kryetari i Partisë Demokratike Lulzim Basha. Pas takimit me kreun e PD-së, Kurti dhe Basha dhanë një prononcim për mediat.
Më herët kryeministri i ri i Kosovës u takua me homologun e tij shqiptar Edi Rama, takim gjatë të cilit u bënë edhe më të dukshme qëndrimet e ndryshëm sa i përket minishengenit.
“Ky ishte takimi ynë i parë, ka dhe shumë tema që do të duhet t’i trajtojmë në të ardhmen dhe mund të them se kjo ishte një temë që e trajtuam shkurtimisht, meqenëse takimi ynë i sotëm ishte më parë, për makroshengenin shqiptar, sesa për minishengenin Ballkanik”, tha z. Kurti.
I prerë në reagimin e tij ishte dhe Kryeministri i Shqipërisë, ku pranoi debatin që ekziston me homologun e tij. Aty për aty, z. Rama iu përgjigj z. Kurtit duke thënë se “pa minishengen Ballkanik” nuk mund të ketë “makroshengen shqiptar”.
“Është e vërtetë që në këtë pikë ne kemi një diskutim për të çuar përpara dhe besoj se nuk ka makroshengen shqiptar pa minishengen Ballkanik”, – u shpreh Rama.