Për herë të parë numri i popullsisë së vendit ka rënë nën shifrën 2.8 milion banorë në 2 793 592.

Popullsia është tkurrur me 1.3%. Kjo është rënia më e madhe në dy dekadat e fundit.

Dy faktorët kryesorë që kanë ndikuar në uljen e numrit të popullatës janë emigracioni dhe shtesa natyrore negative.

Por nëse numri i vdekjeve ka kaluar atë të lindjeve me 3 296 banorë, migracioni neto është – 32 853 banorë duke shënuar bilancin negativ më të lartë të 10 viteve të fundit.  

Numri i atyre që largohen nga Shqipëria është 4,5 herë më i lartë se i atyre që kthehen.

Në vitin 2011 vendi ynë ka pasur 55 mijë emigrantë, por kishte po ashtu edhe 36 mijë të tjerë që ktheheshin për të jetuar duke sjellë pakësimin e popullsisë me 19 mijë persona dhe jo mbi 32 mijë që është sot.

Popullsia e të gjithë qarqeve është ulur me përjashtim të Tiranës. Numri i banorëve të kryeqytetit është rritur me 7 321 gjatë vitit të shkuar.

Qarqet me uljen më të madhe të popullsisë në raport me numrin e banorëve janë Berati dhe Dibra, ndërsa largimet më të mëdha i ka Fieri dhe Elbasani me mbi 7 mijë të larguar.

Sipas projeskioneve të popullsisë, në skenarin negativ numri i banorëve të Shqipërisë në vitin 2031 do të ulej në 2 745 mijë, dhe nëse tkurrja vijon me këto ritme, ky skenar mund të ndodhë brenda dy viteve.

LEXONI GJITHASHTU:

• Tkurrja e popullsisë në rritje, eksperti rendit arsyet
• Tkurrja e popullsisë paraqitur në grafika