Mbi 100 policë nga 13 shtete të ndryshme pjesë e Bashkimit Evropian u vendosën në kufijtë e Maqedonisë së Veriut dhe do të luftojnë migrimin e paligjshëm, trafikimin e qenieve njerëzore dhe të gjitha llojet e kriminalitetit ndërkufitar.

Frontex dhe Maqedonia e Veriut nënshkruan marrëveshje në tetor të vitit të kaluar dhe drejtori i kësaj agjencie tha se qëllimi i tyre është që të shpëtojnë jetët e njerëzve që bien pre e trafikuesve.

“Do doja të kishim një zgjidhje përfundimtare pasi kështu emigrantët nuk do të përdornin atë rutë dhe do ishte edhe për ta më mirë sepse nuk do të binin në duart e trafikuesve të tmerrshëm dhe bandave kriminale. Por mendoj se do japë peshë. Kufijtë janë të rëndësishëm për trafikuesit sepse e kanë pjesë të biznesit por duke qenë më prezent, më aktiv, do luftohet kriminaliteti, bandat, dhe do ti ndihmojmë ata që kanë nevojë për neve. Gjatë periudhës së ardhshme do mësojmë nga policët maqedonas për specifikat e rutës Ballkanike të emigrantëve dhe jam i bindur se do kemi efekt pozitiv. Është një maratonë”, thotë Hans Lajtens, drejtor ekzekutiv i Frontex.

Policia e Maqedonisë së Veriut për çdo ditë përballet me trafikues të emigrantëve

“Dje kishte një incident gjatë tentimit për ndalim të trafikimit të emigrantëve. Janë arrestuar dy trafikues që kanë tentuar ti sulmojnë policët dhe tua marrin armën zyrtare në momentin e arrestimit. Policët kanë reaguar ndaj kësaj situate. Më vjen shumë keq për vdekjen e emigrantit dhe do të bëjmë hetim deri në fund se si ka ndodhur gjithçka”, shprehet Oliver Spasovski, ministër i Brendshëm.

Dënimet për trafikim emigrantësh janë tejet të rrepta dhe fillojnë nga tetë apo dhjetë vite burg e më lartë. Shqipëria, Serbia dhe Mali i Zi e kanë pasur më herët një marrëveshje me Frontex, ndërsa Maqedonia e Veriut bëhet shteti i katërt ballkanik që nis patrullimin e përbashkët

LEXONI GJITHASHTU:

• Brukseli synon kompetenca ekzekutive për Frontex në Shqipëri
• Mbrojtje më e mirë për kufijtë, RMW marrëveshje me Frontex