Paraditja e së shtunës shënoi dyndje njerëzish në tregje të hapura, supermarkete dhe dyqane lagjesh si pasojë e kufizimit të lëvizjeve të vendosura për fundjavën, nga ora 13 e së shtunës deri në 5 të mëngjesit të së hënës.
Flukset e mëdha të njerëzve, siç vërehet edhe nga fotot e mbledhura nga redaksia e Euronews Albania, në shumë raste kanë pamundësuar distancën e sigurisë mes qytetarëve.
Ndonëse edhe farmacitë kanë përjetuar frekuentim të shtuar gjatë orëve të paradites, pjesa më e madhe e njerëzve janë dyndur drejt sigurimit të produkteve ushqimore.
Qarkullimi kufizuar i automjeteve ka qenë i shtuar gjatë këtyre orëve, ndërsa në përgjithësi, vërehet një fluks më i madh i përdorimit të motoçikletave dhe biçikletave. Më herët, autoritetet kanë njoftuar se përveç Policisë edhe Forcat e Armatosura do të patrullojnë në çdo lagje për të siguruar zbatimin e kufizimit të lëvizjeve.
