Gjykata e Fierit ka dënuar këngëtarin dhe ish-noterin Luiz Ejlli me një vit burg, pas hetimeve që zbuluan përfshirjen e tij në një rast falsifikimi dokumentesh. Sipas akuzës, Ejlli, në cilësinë e ish-noterit, së bashku me një shtetas tjetër me inicialet F.A, kanë falsifikuar një deklarate noteriale.

Sipas gjykatës deklarata noteriale u përdor nga shtetasi F.A. për të justifikuar burimin e pasurive të tij me prejardhje të dyshuar nga aktiviteti kriminal.

Prokuroria e Fierit argumentoi se deklarata noteriale, e hartuar nga Ejlli, ishte falsifikuar jo vetëm në përmbajtje, por mbante nënshkrimin dhe vulën e tij, pavarësisht se ai nuk kishte më licencë për të ushtruar funksionin e noterit.

Hetimet zbuluan se, në regjistrat noteriale të vitit 2015, ekzistonte një tjetër deklaratë me të njëjtin numër repertori, por me palë të ndryshme, duke vërtetuar kështu falsifikimin.

“Deklarat noteriale e hartuar nga i pandehuri L.E., ishte falsifikuar në përmbajtjen e saj, por mbante nënshkrimin e këtij të fundit. U provua se, me të njëjtën datë, numër repertori e koleksioni që mbante kjo deklaratë noteriale, në regjistrin e ish noterit L.E. dhe në arkivën e akteve noteriale të hartuara prej tij, në vitin 2015, ekziston një deklaratë noteriale me palë të ndryshme.

Konkretisht, i pandehuri L.E, megjithëse i ishte hequr licensa nga Ministria e Drejtësisë, duke qenë ende në posedim të vulave të noterit, në bashkëpunim me të pandehurin F.A., kanë krijuar deklaratën noteriale me të dhëna të pavërteta, dhe më pas i pandehuri F.A., në datën 25.02.2022, e ka dorëzuar këtë deklaratë noteriale në ish-Prokurorinë Lushnjë”, thuhet në njoftimin e prokurorisë.

VENDIMI I GJYKATËS:

Në datën 02.10.2024, Gjykata e Shkallës së Parë të Juridiksionit të Përgjithshëm Fier ka përfunduar shqyrtimin gjyqësor të çështjes dhe vendosur të deklarojë fajtor të pandehurit për faktin e dërguar për gjykim, si më poshtë:

Deklarimin fajtor të të pandehurit L.E., për kryerjen e veprës penale “Falsifikimi i dokumenteve”, kryer në bashkëpunim, parashikuar nga neni 186 prag.2, i Kodit Penal, dhe dënimin e tij me 12 (dymbëdhjetë) muaj burgim;

Deklarimin fajtor të të pandehurit F.A, për kryerjen e veprës penale “Falsifikimi i dokumenteve”, kryer në bashkëpunim, dhe dënimin e tij me 18 (tetëmbëdhjetë) muaj burgim.

LEXONI GJITHASHTU:

• EMRI| Falsifikoi diplomën e Akademisë së Sigurisë, arrestohet oficeri i policisë 
• Dorëzon mandatin deputeti i Partisë Socialiste, pak ditë pasi u paraqit në SPAK