Kreu i Kishës Ortodokse Ruse i ka shpëtuar paketës së gjatë të sanksioneve. Patriarku Kirill, 75 vjeç, pritej të ishte mes shtetasve rusë të futur në listën e zezë.
Por në fund, Budapesti refuzoi të jepte konsensusin e tij me argumentin e lirisë fetare, duke shkaktuar zemërimin e vendeve anëtare dhe më shumë se një ligjvënësi evropian.
“Ky njeri, i veshur nën petkun e patriarkut, aktualisht është një bashkëpunëtor i Vladimir Putin, që plotëson dëshirat e tij dhe bekon masakrat e tij në Ukrainë. Ndaj e meriton të sanksionohet. Dënoj sjelljen e Viktor Orban dhe shantazhin e tij”. tha euro-deputeti gjerman i Partisë Popullore Europiane, Michael Gahler.
Kirill është një mbështetës besnik i presidentit Putin. Që kur nisi lufta në Ukrainë, ai ka përhapur propagandën e Kremlinit përmes predikimeve fetare.
Kjo është arsyeja përse sanksionet kundër tij u ngritën nga lilderët e BE-së në samitin e së hënës, por me një lëvizje të papritur, Hungaria e bllokoi vendimin gjatë takimit të ambasadorëve ditën e enjte.
Lëvizje që vjen pasi vetë kryeministri Viktor Orban bllokoi embargon totale të naftës ruse.
Tani Hungaria pretendon fitoren, duke deklaruar se luftoi një betejë të gjatë por të denjë.
“Hungaria luftoi një betejë të gjatë, por që ia vleu. Përjashtimi i naftësjellësve dhe ai i patriarkut Kirill nga sanksionet është në linjë me interesat kombëtare të Hungarisë”, deklaroi në Twitter Zoltan Kovaçs, sekretar i shtetit për marrëdhëniet ndërkombëtare.
LEXONI GJITHASHTU