Kur mbeten dhe dy javë nga fundi i Superligës Shqiptare, gara për kreun vijon të jetë e ndezur, me ekipet e kryeqytetit të cilat kërkojnë trofeun.
Tirana dhe Partizani shpresojnë në një ndalesë të njëra-tjetrës, ndërsa ndeshjet e javës së 35 premtojnë surpriza.
Tirana kryesuese përballet me Bylisin, me ballshiotët të cilët janë mobilizuar dhe synojnë 3 pikët. Tekniku Orges Shehi e ka vlerësuar maksimalisht sfidën.
“Deri në fund duhet të kalosh dy pengesa, një është e nesërmja na duhet të jemi gjakftohtë dhe të uritur për çdo situatë që mund të na sjellë loja duke e ditur që janë shumë pak minuta deri në fund”, tha Orges Shehi, trajner i Tiranës.
Në kampin e demave shpresojnë për një hap fals të rivalëve bardheblu.
“Në futboll gjithçka mund të ndodhë. Duke parë që kanë mbetur edhe 2 ndeshje është normale të ketë llogari të tilla. Duke mos e fituar derbin, kemi mundësi të bëjmë llogari për kundërshtarin. Kush është ndjekës bën llogari e kush kryeson jo. Janë 3 skuadra për mbijetesë dhe një përballet me ne e tjetra me Tiranën”, u shpreh Giovanni Colella, trajner i Partizanit.
Diferenca mes Tiranës dhe Partizanit është vetëm 2 pikë, ndërsa ndeshjet e fundit janë ato vendimtaret që mund të përmbysin gjithçka. Në përballjet e tjera Kukësi pret Erzenin, Teuta Egnatian dhe Vllaznia Laçin.
LEXONI GJITHASHTU:
- Superliga shqiptare, Bardheblutë mposhtën Egnatian 2-1, Partizani ‘bie’ në Laç
- S’ka fitues në derbi, Tirana e Partizani ndajnë pikët, java e 33 e Superligës