Një sasi kokaine prej 1.3  tonësh është sekuestruar pasditen e djeshme në një magazinë të madhe frutash në fshatin Krushopek të Komunës së Sarajit në Maqedoninë e Veriut.

DEA dhe autoritetet italiane, prej ditësh ndiqnin hetimet dhe rrugën e kamionit me banane, ndërsa ai ka kaluar edhe në Shqipëri me leje dhe nën monitorimin e SPAK-ut, për të kuptuar nëse lënda narkotike kishte lidhje me grupet kriminale shqiptare.

 Kokaina fillimisht është nisur nga Amerika Latine me kamion bananesh dhe ka zhvilluar itinerarin Itali-Mali i Zi-Shqipëri-Maqedoni e Veriut dhe kishte destinacion final qytetin port Koper, në Slloveni.

Autoritetet maqedonase të ndihmuara edhe nga agjencitë e tjera ligjzbatuese vijojnë hetimet për të zbardhur të gjithë skemën e trafikut, por edhe për të vënë para përgjegjësisë ligjore personat e përfshirë në këtë rrjet.