Suedia do të ofrojë një fond prej 5.6 milionë euro në ndihmë të Shqipërisë për procesin e rindërtimit pas tërmetit të 26 nëntorit. Lajmi është bërë i ditur nga ministri për Bashkëpunimin Ndërkombëtar, Peter Eriksson.
“Tërmeti i nëntorit në Shqipëri ishte një katastrofë e madhe. Sot, vende nga e gjithë bota do të takohen për të treguar mbështetjen e tyre në procesin e rindërtimit. Suedia do të ofrojë 5.6 milionë euro në total”, shprehet z. Eriksson.
Pak ditë më parë ishte ministri i Jashtëm i Holandës, Stef Blok, i cili konfirmoi se vendi i tij do të dhurojë një shumë prej 3 milionë euro për vendin tonë.
Deri tani, Komisioni Evropian ka ofruar një grand prej 15 milionë euro për rindërtimin. Për këtë, Presidentja e KE dhe Kryeministri i Shqipërisë do të nënshkruajnë marrëveshje gjatë Konferencës së Donatorëve sot në Bruksel.
Në raportin e udhëhequr nga Banka Botërore për dëmet e shkaktuara, përllogaritet që fatura të jetë 1 miliard euro. Nga tërmeti i 26 nëntorit, 51 persona humbën jetën kurse rreth 1 mijë të tjerë u plagosën.
