Paqja nuk mund të merret peng nga fuqia e Rusisë. Ka qenë ky mesazhi i presidentit italian dhe atij francez në fillim të samitit të paqes në Romë.

Emmanuel Macron u zotua t’i mbajë hapur kanalet e komunikimit me rusët, por tha se u takon ukrainasve të vendosin se kur është e mundur paqja.

“Ka perspektivë për paqen dhe në një moment ajo do të vijë. Por në të njëjtën kohë, në vartësi të mënyrës se si do të shkojnë gjërat dhe qasjes së liderërve ukrainas, paqja do të arrihet me armiqtë e sotëm të ulur në të njëjtën tryezë. Dhe komuniteti ndërkombëtar do të jetë atje”, tha Macron.

Në të njëjtën linjë u shpreh edhe Mattarella.

“Kërcënimi që po hasim e me të cilin duhet të përballemi po ngre spektrin e rikthimit tek armët bërthamore. Përballë këtyre skenarëve të tmerrshëm, ndërgjegjja jonë duhet të thërrasë mbrojtjen e paqes”, u shpreh Mattarella.

Papa Françesku pritet të mbyllë konferencën “Thirrja për Paqen” me një fjalim që do të mbahet të martën tek monumenti i Koloseut.

Me luftën në Ukrainë që nisi 8 muaj më parë, Papa paralajmëroi kundër një gare armatimesh, por tha se Ukraina ka të drejtë të mbrohet.

LEXONI GJITHASHTU:

• Papa Françesku takim me Macron në Vatikan 
• Të pakënaqur me Macron, qytetarët francezë protestojnë për kostot e larta të jetesës