Kryesia e re Kuvendit të Kosovës do të mbajë sot mbledhjen e parë të drejtuar nga kryeparlamentari i zgjedhur për këtë mandat, Glauk Konjufca.
Rendi i ditës parashikon shqyrtimin e kërkesës për caktimin e delegacionit të Kuvendit të Kosovës për përfaqësim në Asamblenë Parlamentare të Procesit të Bashkëpunimit të Evropës Juglindore dhe në Asamblenë Parlamentare të Këshillit të Evropës.
Konjufca u zgjodh kryetar i Kuvendit të Kosovës më 26 dhjetor të vitit të kaluar, ndërkohë që Qeveria e re ende nuk është formuar.
Pikërisht posti i kryeparlamentarit është ndër pikat e mospajtimit midis Vetëvendosje dhe LDK-së.
Pas takimit që zhvilloi me ish-ambasadorin e misionit të OSBE-së në Kosovë, William Walker, Presidenti i Kosovës, z.Hashim Thaçi pohoi se është në vullnetin e spektrit politik që ta përfundojë me sukses procesin e 6 tetorit.
Thaçi mes tjerash tha se i mbetet kryetarit të partisë që doli e para në zgjedhjet e 6 tetorit që ta bëjë hapin e parë, ndryshe duhet të deklarojë refuzimin si mandatar për udhëheqjen e Qeverisë së re të Kosovës.
Përfaqësues të lartë të trupës diplomatike në Kosovë kanë bërë thirrje të vazhdueshme për formimin e qeverisë, hap ky që do i shërbente konsolidimit të institucioneve dhe shërbimit të qytetarëve të vendit.
