Komisioni i Pavarur i Kualifikimit ka shkarkuar nga detyra Emiljano Rulin, gjyqtar në Gjykatën Administrative të Shkallës së Parë në Tiranë.
Më 11 maj, Ruli iu nënshtrua një seance dëgjimore vetëm në kriterin e pasurisë. Ndër të tjera Komisioni vuri në dukje se konstatoi pamundësi të gjyqtarit Emiljano Ruli dhe të bashkëshortes së tij për blerjen e një apartamenti 2+1 me sipërfaqe 119 m2 në Tiranë, të porositur në vitin 2009 për çmimin 9 milionë lekë.
Po kështu, në kushtet e konfliktit të interesit në gjykimin dhe vendimmarrjen e tre padive të një shoqërie ndërtuese, me të cilën bashkëshortja ka nënshkruar kontratë sipërmarrje në cilësinë e njërit prej bashkëpronarëve të sipërfaqeve të konsiderueshme pyje e tokë në Gjirin e Lalëzit, ku janë ndërtuar komplekse turistike.
Ruli pretendoi në seancë se kishte arritur të provonte të kundërtën e hetimit paraprak qoftë sa i përket pasurisë, qoftë për konfliktin e mundshëm të interesit.
Emiljano Ruli përfundoi studimet në Shkollën e Magjistraturës në vitin 2006 dhe u emërua gjyqtar në Gjykatën e Shkodrës. Prej vitit 2013, Ruli e ushtron funksionin në Gjykatën Administrative të Shkallës së Parë Tiranë.
LEXONI GJITHASHTU: