Forcat RENEA dhe Policia kanë krehur gjatë natës disa zona për kapjen e autorit të vrasjes së dyfishtë Fatmir Kolecaj, por deri tani nuk ka asnjë rezultat. Pasi qëlloi me breshëri për vdekje në pritë mbi ish-bashkëshorten Esmeralda dhe kunatin Vledison Filopati, 47-vjeçari u largua me shpejtësi në një zonë të pyllëzuar.

Për informacione të vlefshme që do të çojnë në kapjen e tij policia ka venë në dispozicion edhe një shpërblim prej 5 milionë lekësh.

Por, ngjarja e së martës mbrëma mesa duket ka qenë një vrasje e paralajmëruar. Sipas një vendimi të gjykatës në Lezhë, autori është dënuar me vetëm 10 muaj burg për dhunë në familje dhe armëmbajtje pa leje duke përfituar edhe uljen e 1/3 së dënimit për shkak të gjykimit të shkurtuar.

Sipas prokurorisë në atë kohë autori dyshuar për krimin e dyfishtë Kolecaj kishte dhunuar bashkëshorten me sende të forta dhe e kishte kërcënuar edhe me vrasje.

Më pas çifti u divorcua dhe dyshohet se konfliktet vijuan për kujdestarinë e 3 fëmijëve që kishin nga martesa disa vjeçare. Ngjarja kriminale u regjistrua në Kodër Rrëshen gjatë mbrëmjes së djeshme, ndërsa hetimet aktualisht po vijojnë për zbardhjen e plotë të saj.