Ndërkohë që thellohet kriza e emigrantëve në kufirin mes Greqisë me Turqinë, krerët e Bashkimit Evropian kanë shprehur mbështetjen e tyre për Greqinë duke i kërkuar Turqisë të respektojë marrëveshjet.
Me shqetësim janë përcjellë pamjet e përplasjeve mes autoriteteve greke dhe emigrantëve të ardhur nga vendet e luftës.
Të hënën është raportuar se një varkë është përmbysur duke sjellë vdekjen e një 6-vjecari, i cili ishte ndër 48 personat që gjendeshin në varkë. Ministria e Jashtme turke ka akuzuar se ushtarët grekë kanë vrarë dy emigrantë në kufirin turko-grek.
Nga ana e tyre, autoritetet greke deklarojnë se kanë kthyer mbrapsht 9 877 emigrantë në përpjekje për të kaluar kufirin. Kryeministri grek Micotakis, gjatë një ndalese në rajonin e Evros afër kufirit greko-turk, tha se Greqia nuk do lejojë të shantazhohet.