Gjatë një vizite në Abu Dhabi, një nga vendet më të pasura të Emirateve të Bashkuara Arabe, Kryeministri Rama është takuar ditën e djeshme me Princin e Kurorës Sheikh Mohamed Bin Zayed Al Nahyan.
Me anë të një videoje në “Facebook”, Rama bën me dije se ky takim kishte temë Rindërtimin dhe Konferencën e Donatorëve në Bruksel, për tërmetin që goditi vendin më 26 nëntor.
“Abu Dhabi, Emiratet e Bashkuara Arabe – Me Princin e Kurorës Sheikh Mohamed Bin Zayed Al Nahyan, enkas për Rindërtimin dhe Konferencën Donatorëve në Bruksel”-shkroi Rama në “Facebook” .
Konferenca e Donatorëve në Bruksel do të zhvillohet më 17 shkurt ku pritet të mblidhen fonde për rindërtimin pas tërmetit të fuqishëm të 26 nëntorit, që u shoqërua me 51 viktima.
Pak ditë më parë u publikua fatura përfundimtare e dëmeve të shkaktuara nga tërmeti i 26 nëntorit të 2019.
Sipas përllogaritjeve të strukturave shtetërore, të ndihmuara edhe nga ekspertë të huaj rezulton se fatura e dëmeve shkon në shifrën e 985 milionë eurove, ndërsa nevoja për rimëkëmbjen shkon përtej vlerës 1 miliard euro.
Shefi i qeverisë shqiptare ka zhvilluar një sërë takimesh për këtë çështje, ku është shprehur optimist se Shqipëria gjatë Konferencës së Donatorëve do të mbledhë një shumë të konsiderueshme monetare për rindërtimin e zonave të shkatërruar nga tërmeti i vitit që shkoi.
