Në cilësinë e Kryeministrit në detyrë, Albin Kurti i ka dërguar të hënën letër Presidentit të Kosovës, Hashim Thaçit. Por, në këtë letër nuk përmendet emri për mandatarin e ri për formimin e qeverisë.

Kjo vjen pas letrës së 2 prillit që Presidenti Thaçi i kishte dërguar Kryeministrit në detyrë Kurti dhe letrës së dytë të 10 prillit, ku në të dy korrespondencat i kërkon atij që në cilësinë e kreut të partisë fituese t’ia dërgonte emrin për mandatar për formimin e qeverisë.

Në letrën e Kryeministrit Kurti thuhet se ai shpreh keqardhje pas dy shkresave të Presidentit, në të cilat siç thuhet Thaçi po deklaron haptas qëllimin për të anashkaluar detyrën e tij kushtetuese që të shpërndajë Kuvendin dhe të shpallë zgjedhjet e reja, pas përfundimit të betejës kundër COVID-19.