Enrico Letta është një njeri i vendosur. Në Itali dhe jashtë shtetit ai ka paralajmëruar vazhdimisht për rrezikun nga ardhja në pushtet e së djathtës ekstreme.

Pasi la mënjanë tonet e qeta të profesorit të universitetit, ai gjatë fushatës elektorale u prezantua si dikush që kërkonte fitoren.

Mandati i tij i parë si kryeministër i Italisë zgjati 10 muaj mes viteve 2013-2014, kur pas dështimit të një votëbesimin në Parlament, lidershipi i kaloi Matteto Renzit.

Vetë Letta u transferua në Paris, ku drejtoi Shkollën për Marrëdhënie Ndërkombëtare dhe Shkenca Politike.

Vite më vonë Renzi e braktisi Partinë Demokratike për të themeluar subjektin e tij politik. Kjo bëri që Letta të kthehej në Itali për të marrë në dorë frenat e partisë, në mars të 2021-shit.

Edhe në rini, ai ka qenë një personazh i njohur. Në moshën 30-vjeçare ai ishte ministër për Politikat Komunitare dhe më pas ministër i Tregtisë dhe Industrisë në qeverinë e Romano Prodit.

Ndërsa në 10 muaj qeverisje, mes sfidave kryesore me të cilat ai u përball ishin fazat e para të krizës migratore drejt Evropës, përfshirë këtu vërshimi i anijeve në detin Mesdhe.

“Zgjedhja ime ra mbi të pasi mora parasysh faktin se pavarësisht se i përket një gjenerate të re, ai ka akumuluar një eksperiencë të rëndësishme”. Këto ishin fjalët që tha për të presidenti i atëhershëm i Italisë, Giorgio Napolitano.

Ndërsa sot, Letta thotë: “Mbi shpatullat tona, të votuesve italianë, nuk është vetëm fati i Italisë, por i gjithë Evropës”.

LEXONI GJITHASHTU

• Kush është Giorgia Meloni, nga lëvizjet fashiste në krye të Vëllezërve të Italisë
• Italia në zgjedhje, qytetarët hedhin votën në kuti
• Si Giorgia Meloni e ka çuar të djathtën ekstreme të Italisë në prag të pushtetit