Një ligjvënës demokrat u bë i pari që bëri thirrje publike për presidentin Joe Biden që të tërhiqet si kandidat në zgjedhje, duke thënë se paraqitja e presidentit në debatin përballë ish-presidentit Donald Trump nuk arriti “të mbrojë shumë nga arritjet e tij”.

Ligjvënësi Lloyd Dogget, nga Teksasi, tha në një deklaratë të martën se presidenti Biden “duhet të marrë vendimin e dhimbshëm dhe të vështirë për t’u tërhequr”.

“Vendimi im për t’i bërë publike këto rezerva të forta nuk u mor lehtë dhe as nuk zvogëlon në ndonjë mënyrë respektin tim për gjithçka që ka arritur presidenti Biden”, tha ligjvënësi Doggett. “Duke patur parasysh se, në dallim nga Trump-i, angazhimi parësor i presidentit Biden ka qenë gjithnjë për vendin tonë, jo veten e tij, kam shpresën se ai do të marrë vendimin e dhimbshëm dhe të vështirë për t’u tërhequr. I bëj thirrje me respekt që ta bëjë këtë”.

Zoti Dogget përfaqëson një zonë në Austin, të Teksasit, dhe shërben në Kongresin amerikan për të 15-ën herë. Ai bëhet ligjvënësi i parë i partisë së tij që deklaron publikisht atë që është thënë me zë të ulët pas kuintave që nga debati televiziv i javës së kaluar. Paraqitja e presidentit Biden shkaktoi panik të menjëhershëm edhe në radhët e mbështetësve të tij më të fortë, duke ngritur dhe shumë pikëpyetje nëse politikani 81-vjeçar është kandidati më i fortë demokrat që mund të përballet në nëntor me ish-presidentin Trump, kandidatin e pritshëm për president të Partisë Republikane.

“Unë përfaqësoj zemrën e një distrikti të Kongresit të përfaqësuar dikur nga Lyndon Johnson-i”, vazhdoi ligjvënësi Doggett, i cili është demokrati numër dy në një komision me rëndësi në Dhomën e Përfaqësuesve. “Në rrethana shumë të ndryshme, ai mori vendimin e dhimbshëm për t’u tërhequr. Presidenti Biden duhet të bëjë të njëjtën gjë”.