Kryetari i grupit parlamentar të Partisë Demokratike, Gazment Bardhi e ka cilësuar një tallje të drejtësisë me drejtësinë vendimin e gjykatës së Elbasanit për të liruar nga burgu ish-ministrit Saimir Tahiri.

Bardhi shprehet se vendimi i sotëm është një turp për drejtësinë dhe nxitje për thellimin e korrupsionit dhe abuzimit me pushtetin.

“Ish-Ministri i Brendshëm Saimir Tahiri do të mbahet mend si ministri kampion i Edi Ramës që garantojë paprekshmërinë e grupeve kriminale, thellojë bashkëpunimin e shtetit me to dhe si kurrë më parë me leje shtetërore mbushi vendin me kanabis, duke favorizuar fuqizimin e krimit të organizuar. Lirimi para kohe me kusht i tij është një tallje e drejtësisë me drejtësinë. Ndërsa qytetarët shqiptarë presin nga drejtësia e re t’i jepet fund pandëshkueshmërisë, zyrtarët e lartë të korruptuar përfitojnë nga vendime gjyqësore thellësisht politike, që i shndërrojnë dënimet e tyre në qesharake. Në emër të Grupit Parlamentar të Partisë Demokratike e konsideroj vendimin e sotëm politik të Gjykatës së Elbasanit një turp të drejtësisë dhe si një nxitje për thellimin e korrupsionit dhe abuzimit me pushtetin”, thuhet në reagimin e Bardhit.

Gjykata e Elbasanit ka liruar nga burgu ish-ministrin e Brendshëm Saimir Tahirir, duke vendosur që ta kryejë pjesën e mbetur të dënimit në shtëpi.

Vendimi u mor gjatë seancës gjyqësore të kësaj të mërkure nga gjyqtarja Matilda Fetahu, pas kërkesës së ardhur nga prokuroria.

Fetahu pranoi kërkesën e prokurorisë për rrethana lehtësuese familjare ndaj Tahirit, nën argumentin se atij i duhej të kujdesej për fëmijët e mitur për shkak të problemeve shëndetësore të bashkëshortes.

LEXONI GJITHASHTU:

• Gazetari zbulon akt-ekspertizat mjekësore: Pse u lirua ish-ministri Saimir Tahiri
• Lirohet nga burgu ish-ministri i Brendshëm Saimir Tahiri