Operacioni Forca e Ligjit shfaqi sot pamjet e automjeteve të sekuestruara dhe bllokuara në gati 3 javë aksion. Dy individë të tjerë me të shkuar kriminale duhet të justifikojnë pasurinë duke e çuar në 28 numrin e subjekteve që preken nga ligji special.
Këto janë automjetet, disa prej të cilave të blinduara që janë sekuestruar ose bllokuar deri më tani nga operacioni forca e ligjit. Disa prej automjeteve luksoze janë sekuestruar me urdhër të drejtorit të përgjithshëm të policisë Ardi Veliu ndërsa të tjerat po verifikohen.
Ndërkohë OFL-ja i kërkoi Altin Lamajt i dënuar në Itali për “Vrasje në rrethana cilësuese” dhe Eduart Dushkut i dënuar për “Shkatërrim të pronës me zjarr” , që të justifikojnë pasurinë.
Këta individë, si subjekt i Ligjit Special, duhet t’u përgjigjen me shkrim, brenda 48 orësh, të gjitha pyetjeve të OFL-së, të cilat do t’i dërgohen SPAK-ut, për veprime të mëtejshme.
Shumica e dosjeve të OFL-së tashmë janë në tryezat e prokurorëve të SPAK. Brenda kësaj jave pritet që Struktura e Posaçme kundër Krimit të Organizuar dhe Korrupisonit t’i drejtohet Gjykatës Speciale për të vendosur në sekuestro disa nga pasuritë e personave që i janë nënshtruar forcës së ligjit.
