Martin Cani, adoleshenti që humbi jetën më 18 nëntor të vitit të kaluar pas një sherri tragjik pranë shkollës “Fan Noli” në Tiranë, të dielën e 13 prillit do të festonte ditëlindjen e tij të 15-të.
Me lule dhe tullumbace që formonin emrin “Martin”, prindërit e adoleshentit ishin të dielën pranë varrit të tij ku shfaqën dhimbjen e thellë për mungesën e të birit në këtë ditë që do të duhej të ishte e gëzueshme.
Babai dhe nëna e Martinit sollën lule të bardha dhe lëshuan tullumbace drejt qiellit, si një mesazh dashurie dhe përkujtimi për djalin e tyre.
Pranë varrit ishte vendosur një kornizë me mbishkrimin: “Martin, ylli më i bukur i qiellit”.
“Në është thyer zemra në mijëra copa… Na merr malli të dëgjojmë zërin tënd, por është e pamundur… Sy bukuri jonë, do të na mungosh pafund. Kujtimet e tua do të mbeten përjetë”, shkruanin më tej prindërit, duke përcjellë dhimbjen për humbjen e parakohshme të Martinit.
Ngjarja ndodhi më 18 nëntor 2024, rreth 200 metra larg shkollës “Fan Noli”, ku 14-vjeçari u godit me thikë disa herë nga një bashkëmoshatar i tij. Përveç vrasjes së Martinit, u plagos edhe një shok i tij, ndërsa autori u vetëplagos me të njëjtën thikë, të cilën më pas e hodhi në një ndërtesë të braktisur.
LEXONI GJITHASHTU:
- Vrasja e Martin Canit: Autori kërkoi lirimin nga qelia, Gjykata e Lartë jep vendimin
- Vrasja e Martin Canit, Mario Përlleshaj çohet në gjykim, bie kërkesa e avokatëve