Një person ka qëlluar dhe vrarë pesë punonjës në një nga fabrikat më të mëdha të birrës në Miluoki të Shteteve të Bashkuara dhe më pas ka vrarë veten.

Agresori u identifikua si një 51-vjeçar vendas, ndërsa motivet e veprimit të tij mbeten të paqarta.

Të shtënat ndodhën në orët e pasdites, teksa disa qindra punëtorë ndodheshin në fabrikë. Teksa incidenti ndodhi, shkollat dhe bizneset pranë vendit të ngjarjes u mbyllën me urdhër të autoriteteve. Këto të fundit besojnë se agresori veproi i vetëm.

Sulmi ndodhi në një kompleks që përfshin edhe zyrat e disa korporatave dhe fabrikën e birrës, i njohur si “Lugina Miller”.

Pesë viktimat ishin punonjës të birrarisë. Përpara këtij incidenti, në Shtetet e Bashkuara janë verifikuar tre raste të tjera të ngjashme që nga fillimi i vitit, me 12 viktima në total.