Rriten të ardhurat në buxhetin e shtetit. Treguesit fiskalë të ministrisë së financave, nxjerrin se nga janari deri në prill janë mbledhur 206.5 mld lekë.
Një vit më parë qeveria mblodhi për të njëjtën periudhë 188 mld lekë, ose 10% më pak.
Në një vështrim të përgjithshëm rezulton se arkëtimet janë rritur në Tatime e Dogana, ndërsa me zëra specifik ndikim pozitiv ka dhënë akciza, taksat doganore, tatimi i pagave dhe tatimi mbi fitimin.
Rritja me dy herë e pagës minimale përgjatë vitit që kaloi si dhe e pagave në sektorin publik kanë sjellë më shumë të ardhura në buxhet në këtë zë.
Por efekte pozitive rritja e pagave ka sjellë edhe në skemën e sigurimeve shoqërore.
Ndërkohë, tvsh e importuar dhe renta minerare janë vjelë në masë më të ulët se vitin e kaluar.
Nga ana tjetër edhe shpenzimet janë rritur në janar-prill, edhe pse në një nivel më të ulët nga sa parashikohej. Ato rezultojnë 172 mld lekë, me rritje vetëm 3 mld.
Me këtë ecuri, raporti mes të ardhurave dhe shpenzimeve e nxjerr buxhetin me një suficit në masën 33.9 mld lekë.
LEXO GJITHASHTU:
- BERZH bën parashikimin për ekonominë shqiptare, situata 2023-2024
- Kapi rekordet më të ulëta historike, euro rritet pas fushatës elektorale