Kancelarja gjermane, Angela Merkel dënoi sulmet me armë zjarri ndaj lokaleve të emigrantëve në qytetin Hanau, ku mbetën të vrarë 9 persona.
Në reagimin e saj, Merkel shprehet se racizmi është një helm që ekziston në shoqërinë gjermane dhe që duhet fajësuar për shumë krime. Ajo nënvizon se të gjitha provat e mbledhura deri tani tregojnë se dy sulmet ishin të motivuara nga racizmi dhe ekstremizmi i djathtë.
Merkel thekson se Gjermania nuk i ndan qytetarët në bazë të origjinës dhe besimit fetar dhe ka shtuar se qeveria e saj do të përballet me ata që po përpiqen të përçajnë vendin. Më tej kancelarja iu bën thirrje autoriteteve përkatëse që t’i hetojnë deri në fund dy ngjarjet kriminale.
9 persona u vranë dhe më shumë se gjashtë u plagosën rëndë pasi një neo-nazist gjerman hapi zjarr në dy locale një natë më parë në Hanau.
Tobias Rathjen, 43 vjeç, i rritur në Hanau, fillimisht hapi zjarr në dy lokale që frekuentoheshin nga banorët lokalë kurd.
Tre persona vdiqën në vend në lokalin e parë. Kurse në lokalin e dytë, 2.5 km më larg, mbetën të vdekur pesë të tjerë. Një person tjetër humbi jetën pak më vonë.
Pas nisjes së kërkimeve nga policia, në një apartament jo larg vendin të ngjarjes, u gjetën dy trupa të pajetë, që dyshohet se janë autori i krimit dhe nëna e tij.
