Mësuesit e 9-vjeçares “Rexhe Deliu” në Rinas shprehen se 90% e fëmijëve kanë munguar sot në shkollë për shkak të vendimit për rrugën me një sens lëvizjeje.
“Janë paraqitur vetëm nxënësit që janë këtu afër, që nuk vijnë me mjet”, u shpreh një nga mësuesit.
Ndërsa një tjetër tha se edhe ai vetë është detyruar që bëjë më shumë shumë kilometra rrugë për të ardhur në punë.
“Unë vij nga Fushë-Kruja, duhet të kaloj Vorë, Qafë Kashar për të ardhur në Rinas. Është një rrugë e përditshme. Vetëm 10 fëmijë ishin në shkollë. Fëmijët kanë bojkotuar shkollën. Kjo rrugë nuk ka pasur ndonjë trafik, duhet ta mendojnë mirë për komunitetin. Unë i kam ardhur rreth e rreth rrugës sot. Unë po bëj 30 km, nga 8 që duhet të bëj”, u shpreh ai.
Banorët e fshatrave rreth Rinasit zhvilluan sot protestën e tretë, ku kundërshtuan vendimin ARRSH-së për lejimin e mjeteve vetëm me një sens drejtimi drejt aeroportit të Rinasit.
Aktualisht për të shkuar në aeroportin e Rinasit, mjetet duhet të ndjekin rrugën Qafë Kashar- Rrethrrotullimi i aeroportit të Rinasit e deri në Ahmetaq. Ndërsa për t’u kthyer, do të ndjekin rrugën Ahmetaq, Vorë – Qafë Kashar.
Për mjetet që vijnë nga veriu në drejtim të Rinasit, do duhet të ndjekin itinerarin Fushë Krujë -Vorë -Qafë Kashar dhe aeroport.
ARRSH mori këtë vendim më 1 maj për shkak të trafikut të rënduar të automjeteve që shkonin drejt aeroportit pas lirimit të masave anti-covid.
LEXONI GJITHASHTU:
