Ministrja e Arsimit ka njoftuar se shkolla “Janaq Kilica” në qytetin e Fierit, që u bë protagoniste 2 herë brenda pak ditëve për shkak të helmimit të disa nxënësve, do t’i nënshtrohet rikonstruksionit të plotë. Përmes një statusi në faqen e vet në Facebook, ministrja Shahini shton se po shqyrtohen ankesat për ndërhyrje politike në këtë shkollë pas incidenteve të fundit, të cilat sipas saj janë stisur nga opozita jashtëparlamentare.
“Nuk do të lejojmë që ngjarje të manipuluara politikisht për të shkaktuar kaos të dëmtojnë punën e mirë që bëhet në atë shkollë prej shumë e shumë vitesh. Kemi shtuar oficerët e sigurisë dhe prezencën e psikologut në shkollë, në mënyrë që të mbështesim drejtoren e cila po bën një punë të mirë në organizimin e shkollës.
Ankesat për ndërhyrje politike në shkollë po i hulumtojmë me kujdes dhe do të marrim masa që të sigurohemi se tensionet politike të stisura nga opozita jashtë-parlamentare mos të ndikojnë punën e rëndësishme shkollore”, – shkruan mes të tjerash ministrja.
Një ditë më parë 60 nxënës të shkollës “Janaq Kilica” në Fier u helmuan në ambientet e shkollës dhe u paraqitën me urgjencë në spitalin e qytetit. Nxënësit sipas Ministrisë së Shëndetësisë kishin probleme në frymëmarrje, ndërsa një pjesë edhe me neuroza paniku. Nxënësit thonë se janë ekspozuar ndaj një substance, sipas mjekëve e padëmshme, por që irriton kanalet e frymëmarrjes.
Sipas policisë së Fierit, paraprakisht dyshohet se një nxënës ka përdorur spraj piperi.
