Dikur këto rrugë gumëzhinin nga të qeshurat e fëmijëve, por sot ecin në heshtje vetëm të moshuarit. Fenomeni i braktisjes së vendit është shndërruar në një plagë me përmasa kombëtare.
Në qarkun e Elbasanit, histori si e 74-vjeçares Kadrije Selimi, nga fshati Mollas i Cerrikut janë të shumta. E moshuara me brengë tregon se emigrimi e ka ndarë nga fëmijët.
“Një e kam larg, një e kam këtu ai është i sëmurë për vete, më thonë fjalë të mira por në këtë kohë që ka ardhur më mirë vetëm, apo jo”-tha Kadrije Selimi.
Fshati dikur numëronte 300 familje, ndërsa sot nuk kanë mbetur as çereku i tyre.
“Mund te kenë ikur 80 %, ka ngel dhe nja 20 %. Qe e tërë lagjia këtu me njerëz tani mund të jenë nja pesë a gjashtë, më tepër nuk ka kanë ikur.”
Largësia, mungesa e infrastrukturës dhe gjendja e vështirë ekonomike ka bërë që qindra njerëz të lënë shtëpitë e tyre.
“Këtu drejt janë katër a pesë shtëpi që janë larguar, të gjithë. Unë kam dy kunetërit e mi që erdhën ndenjtën nja pesë gjashtë vjet e ikën prapë, andej janë”-tha ajo.
Edhe pse me bukuri të rralla natyrore, jetesa tashmë në këto fshatra është bërë e vështirë.
Dyqane, kopshte e zyra u mbyllën ndërsa shkolla numëron vetëm 5 nxënës, edhe këta në pritje për tu larguar së bashku me prindërit e tyre.
LEXONI GJITHASHTU:
- Mbreti Charles bën paraqitjen e parë publike që prej diagnostikimit me kancer
- “SHBA s’lejon të preket Kosova”,Burimi: Serbia po armatoset, e shpreh qartë synimin
