Shumë kamionë me mallra janë bllokuar në kufirin polak, pasi vendi mbylli kufijtë të premten për shkak të coronavirusit.

Kjo ka ngjallur pakënaqësi në Bruksel, që ka reaguar duke thënë se tregu unik duhet të vazhdojë të funksionojë.

“Kam bërë disa telefonata me kryeministrin polak. Ishte kënaqësi të dëgjoja kur u tha shteteve anëtare se po punojnë për të siguruar që të ruhet një korridor i hapur për të gjithë kamionët e mallrave”, tha Presidentja e Komisionit Europian, Ursula von der Leyen.

Von der Leyen njoftoi në fillim të kësaj jave se do të mbahen disa korridore transporti që do të garantojnë qarkullimin e mallrave, sidomos të pajisjeve mjekësore bazë.

Polonia është vetëm një nga 12 shtetet që kanë vendosur postblloqe në kufi për të bërë kontrolle.

Më pas, Bashkimi Europian mbylli kufijtë e jashtëm për t’u siguruar që mallrat bazë do të mbeteshin brenda vendit, dhe që njerëzit të vazhdonin të qarkullonin.

Megjithatë, ka shqetësime se shoferët e kamionëve mund të  jenë mbyllur në shtëpi për shkak të coronavirusit, dhe të krijojnë një mungesë.

“Këtë javë duhej të ndërronim shoferët, por pesë prej tyre thanë se nk do të dalin në punë për sa kohë të vazhdojë epidemia. Gjysma e kamionëve mund të mos vihet në punë për shkak të mungesës së shoferëve”, tha Akos Sodar, drejtor i “Speed Log”, për Euronews.