Tri rastet e dyshuara me coronavirus ditën e sotme në Kosovë kanë rezultuar negative.
Instituti Kombëtar i Shëndetësisë Publike i Kosovës (IKSHPK) gjatë ditës së sotme ka marrë informatë nga Klinika Infektive e QKUK për tri raste të dyshimta në coronavirus Covid-19.
“Pacientët u kontrolluan nga ekipi i infektologëve në Klinikën Infektive në QKUK dhe iu morën mostrat për testim laboratorik në virusin SARS-CoV-2 dhe Influenza A dhe B.
Ekipi i Laboratorit të Mikrobiologjisë Molekulare në IKSHPK ka bërë testimin në virusin SARS CoV-2 dhe në influencë A dhe B me metodën rRT-PCR të të tre pacientëve.
Testet kanë rezultuar negative për të tri analizat, domethënë të tre pacientët nuk janë të infektuar me virusin SARS-CoV-2 as me Influencë A dhe B”, – thuhet në njoftimin e IKSHPK.
Në Klinikën Infektive në QKUK, sot u paraqitën 3 raste të dyshuara për coronavirus. Një shtetas jo kosovar, 69 vjeç i cili kishte qëndruar në Itali, dy shtetas të tjerë janë kosovarë, njëri 25 vjeç dhe tjetri 23 vjeç, të cilët kishin ardhur sot nga Italia.
