Kjo hare dhe buzëqeshje në fytyrat e fëmijëve në qytetin e Elbasanit lidhet me ardhjen e Ditës së Verës.
Kremtimet për festën tradicionale të qytetit kanë nisur, edhe pse duhen disa ditë për datën 14 mars. Ditët e mbetura d të jenë të pasura me aktivitete të larmishme, të cilat kanë nisur ta përcjellin atmosferën e festës tek fëmijët e shkollave dhe kopshteve.
“Jam shumë e lumtur që erdhi Dita e Verës, hajdeni të gjithë në Elbasan”, thotë një vogëlushe.
Për mësuesit, përçimi i traditës është qëllimi i organizimit të aktiviteteve të ndryshme.
“Është shumë e rëndësishme përcjellja e traditës, si nga familjet ashtu edhe nga institucionet arsimore, sepse kjo bën që tradita të ruhet. Dhe fëmijët të rriten me frymën e festimeve, frymën e traditës nëpër familje, të rriten me frymën e mikpritjes të dashurisë për të gjithë mysafirët që vijnë anembanë në Elbasan”, shprehet Dorina Prifti, mësuese në shkollën “Onufri” Në Elbasan.
Ruajtja dhe përcjellja brez pas brezi e traditës së festës është domethënëse edhe për familjarët e vogëlushëve.
“Ka shumë rëndësi sepse i jep edukatën, i jep traditat që të mos harrohen të mos humbasin, dhe fëmijët bëhen më të mençur, më të zgjuar, dhe e dinë që paraardhësit e tyre kanë qene në këtë traditë. është dita e luleve, dita që edhe fëmijët vishen me lehte, është dita më e bukur”, thotë një e moshuar.
Ndërkohë që qyteti i Elbasanit bëhet gati për festën e Ditës së Verës, duket se ardhja e pranverës ka zbukuruar rrugët me çeljen e luleve të para, ndërkohë që amvisat bëhen gati për të gatuar ballokumet. Përgjatë ditëve të mbetura, në Elbasan do të zhvillohen një sërë aktivitetesh në pritje të Ditës së Verës.
