Besimtarët myslimanë në Kosovë sot festojnë Fiter Bajramin. Në mesazhin e tij për festën, myftiu i Kosovës, Naim Tërnava bëri thirrje për paqe në gjithë botën.

Ai tha se shumë vende janë në luftë dhe qytetarët e pafajshëm pësojnë më së shumti.

“Kur ne sot po festojmë të lirë Fiter Bajramin, kur ne po shijojmë mirësitë e kësaj feste, në shumë vende të botës, kemi konflikte, luftëra e gjakderdhje, ku popullata e pafajshme po përballet me padrejtësi, dëbime e vrasje e shkatërrime. Nuk është ky misioni i njeriut në këtë botë, nuk është ky misioni ynë në këtë jetë. Kështu nuk na mësojnë librat e Zotit, e nuk na kanë ligjëruar kështu as pejgamerët e tij,” – u shpreh Tërnava.

Ai u lut që në vatrat e luftës të vendoset paqe dhe qetësi.

Ky është Bajrami i parë në dy vite që besimtarët në Kosovë e shënuan pa masat kufizuese, që i ka imponuar pandemia e COVID-19.

LEXONI GJITHASHTU:

• Të hënën besimtarët myslimanë falin Fiter Bajramin në sheshin ‘Skënderbej’