Shkencëtarët kanë testuar me sukses një ilaç të ri që mund të imitojë përfitimet e stërvitjes rigoroze.
Një ekip nga Universiteti i Floridës në SHBA testoi ilaçin tek minjtë obezë, duke arritur të përshpejtojë metabolizmin e tyre dhe të rrisë muskujt e humbjen e peshës, shkruan Euronews.
Ushtrimet e rregullta mund të kenë një ndikim të madh pozitiv në shëndetin tuaj, me përfitime të vërtetuara për njerëzit me sëmundje kardiovaskulare, diabet dhe lloje të caktuara të kancerit. Përveç kësaj, aktiviteti fizik është gjithashtu i lidhur me një shëndet më të mirë të trurit, me një rrezik më të ulët të stresit, depresionit ose demencës, sipas Shërbimit Shëndetësor Kombëtar të Mbretërisë së Bashkuar (NHS).
Organizata Botërore e Shëndetësisë (OBSH) rekomandon nga 2,5 deri në 5 orë në javë aktivitete mesatarisht intensive, por për fat të keq, 25 për qind e të rriturve dhe 80 për qind e adoleshentëve nuk e respektojnë këtë rekomandim.
Për të korrur përfitimet e aktivitetit fizik, shkencëtarët kanë kërkuar prej vitesh mënyra se si mund t’i kenë ato pa stërvitje rigoroze, qoftë edhe një pjesë të vogël të këtyre përfitimeve shëndetësore, dhe mesa duket kanë pasur sukses.
Ilaçi është pjesë e një klase të propozuar trajtimesh të njohura si “mimetikë të ushtrimeve” që imitojnë përshtatjet fiziologjike që lidhen me aktivitetin fizik.
Shkencëtarët vunë re se minjtë që u testuan dogjën më shumë kalori pa ndryshuar asgjë në aktivitetin ditor. Minjtë gjithashtu grumbulluan më pak yndyrë në trupin e tyre.
Megjithëse gjetjet fillestare duken premtuese, nevojiten kërkime shtesë, përfshirë efektet negative, përpara se të fillojnë provat në njerëz.
LEXONI GJITHASHTU:
- “Kanceri ka shumë kosto”, Pacientja: Mjerë ata që nuk kanë për ilaçe e kimioterapi
- Tentoi të fuste ilaçe kontrabandë, arrestohet 54-vjeçari në Morinë